Íslenska landsliðið í handbolta vann öruggan sigur á Þjóðverjum í leik sem fór fram í Hannover í dag. Var þetta lokaleikur liðsins í undirbúningi fyrir EM í Póllandi þar sem íslenska liðið hefur leik gegn Norðmönnum á föstudaginn. Lokatölurnar urðu 27:24 fyrir Ísland en Íslendingar leiddu allan seinni hálfleikinn með 4-6 marka mun.
Ísland náði snemma undirtökunum í leiknum og breytti stöðunni úr 5-5 í 9-5 um miðbik fyrri hálfleiks. Staðan í leikhléi var 15:12 fyrir Ísland.
Aron Pálmarsson var markhæstur í íslenska liðinu með 7 mörk, mörg þeirra stórglæsileg. Björgvin Páll Gústafsson stóð í markinu allan leikinn og varði 15 skot, þar af eitt vítakast. Flestir ef ekki allir leikmenn íslenska liðsins áttu góðan leik og gefur frammistaðan vonir um góðan árangur á EM.