Íslensku stelpurnar í umspil

Noregur hafði betur í viðureign gegn Íslandi í kvöld í fótbolta með tveimur mörkum gegn einu. Keppt var á Ullevaal leikvanginum í Ósló, en var þetta leikur í síðustu umferð undankeppni Evrópumóts kvenna í knattspyrnu.

Með sigrinum í kvöld hafa Norðmenn tryggt sér sigur í riðlinum og keppa því á Evrópumótinu. Ísland er í öðru sæti riðilsins með 22 stig og fer í umspil um sæti á mótinu. Íslendingum hefði nægt jafntefli í leiknum til að komast á EM. Norsku stelpurnar voru yfir í hálfeik og skoraði Margrét Lára Viðarsdóttir mark á 66.mínútu.

Umspilsleikurinn fer fram í október en ekki liggur fyrir hvort Ísland mætir Rússlandi, Spáni, Skotlandi, Úkraínu eða Austurríki.