Í kvöld verður tilkynnt hver hlýtur nafnbótina íþróttamaður ársins 2011 þegar árlegt hóf þess efnis fer fram á Grand Hótel. Þetta er í 56. skipti sem valið fer fram.

Tíu íþróttamenn úr fimm greinum koma til greina í kvöld en það eru þau Anna Úrsúla Guðmundsdóttir, Aron Pálmarsson, Ásdís Hjálmsdóttir, Heiðar Helguson, Jakob Örn Sigurðarson, Kári Steinn Karlsson, Kolbeinn Sigþórsson, Ólafur Björn Loftsson, Sara Björk Gunnarsdóttir og Þóra Björg Helgadóttir.

Alls hlaut 31 íþróttamaður atkvæði í kjörinu að þessu sinni sem samtök íþróttafréttamanna standa að. Mikið er um nýliða í ár en aðeins einn á listanum yfir efstu tíu var þar einnig í fyrra, Aron Pálmarsson.

Hátíðin er að vanda í beinni sjónvarpsútsendingu Sjónvarpsins og hefst klukkan 20.15.