Arsene Wenger, knattspyrnustjóri Arsenal, ætlar ekki að kaupa leikmenn til að leysa þau vandamál sem liðið glímir við vegna meiðsla fjölda leikmanna. Sérstaklega vantar liðið bakverði.

„Að eyða peningum er ekki takmarkið. Það hefur aldrei verið þannig,“ segir Wenger en það þarf ekki að koma neinum stuðningsmanni Arsenal á óvart. „Við þurfum bara að fá leikmennina okkar til baka. Okkur vantar tíu leikmenn núna. Það sáu allir hvað við gerðum í seinni hálfleik gegn Manchester United án allra þessara manna. Það er mikilvægt fyrir okkur að fá þá til baka.“