Óþekktaranginn Mario Balotelli hefur verið ákærður af enska knattspyrnusambandinu fyrir ofbeldi gegn Scott Parker leikmanni Tottenham og á yfir höfði sér allt að fjögurra leikja bann.

Balotelli virtist traðka á höfði Parkers í leik liðanna á sunnudag en dómari leiksins virtist ekki sjá atvikið. Balotelli, sem skoraði sigurmark Manchester City í leiknum úr vítaspyrnu í uppbótartíma, hefur þar til á miðvikudag til að bregðast við ákærunni.

Enska knattspyrnusambandið hafði líka til skoðunar atvik þar sem Joleaon Lescott varnarmaður City virtist kýla Younes Kaboul varnarmann Tottenham í andlitið en hann slapp við ákæru.

Balotelli hefur skorað 9 mörk í ensku úrvalsdeildinni fyrir City en fíflalæti hans innan og utan vallar hafa vakið mun meiri athygli á Bretlandi en hæfileikar hans á knattspyrnuvellinum.