„Vil biðja þjóðina afsökunar,“ skrifar íslenski landsliðsmarkvörðurinn Björgvin Páll Gústavsson á Facebook-síðu sína í kvöld. Björgvin Páll hefur átt afar erfitt uppdráttar á EM í handbolta og talsvert frá sínu besta milli stanganna í þessu stórmóti.

Hefur hann mátt þola gagnrýni vegna þessa. Markvarslan og vörnin var slöpp í leiknum gegn Slóvenum í kvöld sem tapaðist 34-32 eftir að Íslendingar höfðu fengið gefins tvö mörk undir lok leiks. Króatar lögðu svo Norðmenn í lokaleik D-riðils sem þýðir að Slóvenar drógu Íslendinga með sér í milliriðil á kostnað Norðmanna sem eru ALVEG brjálaðir útaf bolabrögðunum.

Björgvin Páll axlar hins vegar ábyrgð á döprum leik sínum í kvöld og vitnar í fleyg orð körfuknattleiksgoðsagnarinnar Michael Jordan í lok færslu sinnar:

„I‘ve failed over and over and over again in my life and that is why I succeed.“

Sem lauslega þýtt myndi útleggjast: „Mér hefur mistekist aftur og aftur í lífinu og þess vegna hef ég náð árangri.“