Björgvin Páll Gústavsson, landsliðsmarkvörður Íslands í handbolta, verður með í fyrsta leik Íslands gegn Króatíu á EM í kvöld. Þetta hefur Einar Þorvarðarson, framkvæmdastjóri HSÍ, staðfest við Vísi.

Björgvin Páll hefur verið rúmliggjandi og í hálfgerðri einangrun vegna veikinda eftir að liðið lenti í Serbíu en hann hefur nú fengið grænt ljós á að spila í kvöld.

Vegna veikindanna var Aron Rafn Eðvarðsson, markvörður Hauka, kallaður til og lenti hann til Serbíu í nótt. Hann verður því til taks ef Björgvini slær niður aftur.

Ljóst er að þetta eru gríðarlega góð tíðindi fyrir strákana okkar enda Björgvin verið algjör lykilmaður liðsins undanfarin fjögur ár.