Sjöfaldur heimsmeistari í Formúlu 1, Michael Schumacher, er ekki viss um að hann muni keyra áfram fyrir Mercedes-liðið á næsta ári þrátt fyrir að vera með samning þess efnis.

„Ég kom til Mercedes með ákveðið plan: Ekki að vinna allar keppnir heldur að þróa liðið,“ segir hann við ítalska blaðið Corriere dello Sport.

„Ef eitthvað er, þá er ég vandamálið. Það er staðreynd að ég er rólegri en áður og kannski ekki með rétt hugarfar. Á einhverjum tímapunkti mun ég taka ákvörðun um hvort ég haldi áfram eða hreinlega hætti aftur,“ segir Michael Schumacher.