Axel Bóasson, GK, er enn efstur á Íslandsmótinu í höggleik en lokahringurinn stendur nú yfir bæði hjá konum og körlum. Axel hefur lokið við níu holur af átján í dag og hefur þriggja högga forystu á Kristján Þór Einarsson, GKJ.

Aðstæður á Leirunni í dag eru mjög erfiðar og þurfti að fresta leik tvívegis í morgun vegna mikils roks. Vindinn hefur lægt en er þó að gera mörgum kylfingum nokkurn óleik.

Axel lék fyrri níu á þremur höggum yfir pari en Kristján Þór Einarson er að leika besta golfið hingað til. Hann er búinn með ellefu holur og hefur leikið þær á tveimur undir.

Úrslitin eru sama og ráðin í kvennaflokki en þar hefur Ólafía Þórunn Kristinsdóttir þrettán högga forystu á næstu konu, Tinnu Jóhannsdóttur. Konurnar hafa lokið við þrettán holur og er því fátt sem kemur í veg fyrir að Ólafía Þórunn verði meistari á Leirunni seinna í dag.

Hægt er að fylgjast með skori kylfinga í beinni hér.