Íslandsmótinu í hestaíþróttum lauk í gær og var það síðasta mótið þar sem þeir knapar, sem sóttu eftir landsliðssæti, höfðu tækifæri á að sanna sig. Í dag munu landsliðsstjórar ganga á fund landliðsnefndar og tilkynna endanlegt val á fullskipuðu landsliði.

Á síðustu mánuðum hafa landsliðsstjórar kynnt sér og fylgst með knöpum sem höfðu áhuga á landsliðssæti og hestum þeirra. Íslenska landsliðið verður tilkynnt í Líflandi á þriðjudag en þá verður tilkynnt hvaða tíu knapar og hestar hafa verið valdir sem fulltrúar Íslands í St. Radegund í ágúst.