„Mér finnst þetta fáránlegt,“ segir Ragna Ingólfsdóttir badmintonkona um reglur sem Alþjóða badmintonsambandið hugðist láta taka gildi 1. júní næstkomandi. Samkvæmt reglunum átti að banna konum að vera í stuttbuxum og skikka þær til að klæðast pilsum á badmintonvellinum. Stjórn alþjóða badmintonsambandsins hefur samþykkt að fresta gildistöku reglnanna í annað sinn.

„Sumar stelpur hér á landi vilja vera í stuttbuxum af því að þeim finnst það þægilegra, þannig að af hverju að láta þær vera í pilsum ef þær vilja það ekki?“ Þessu veltir Ragna upp í samtali við AP-fréttastofuna sem fjallað hefur um málið. Margir leikmenn hafa lýst yfir andstöðu sinni við reglurnar.

Reglurnar áttu eins og áður segir að taka gildi um næstu mánaðarmót en áður hefur gildistöku reglnanna verið frestað. Enn frekari frestun á gildistöku reglnanna var svo samþykkt á fundi stjórnar sambandsins í gær sem haldinn var samhliða stórmóti sem fram fór í Kína um helgina. Ragna er stödd á mótinu.