Miami Heat vann þriðja leikinn gegn Chicago Bulls í úrslitum austurdeildarinnar í NBA í nótt. Chris Bosh var í miklu stuði í leiknum og skoraði 34 stig í 96-85 sigri Heat sem hefur þar með tekið 2-1 forystu í einvígi liðanna.

Lebron James skoraði 22 stig, gaf 10 stoðsendingar og tók 6 fráköst. Þriðja stórstjarnan Dwyane Wade var heldur rólegri og setti 17 stig og tók 9 fráköst.

Carlos Boozer hélt Bulls inni í leiknum og skoraði 26 stig, Derrick Rose bætti við 20 en Heat náði undirtökum í leiknum í fjórða leikhluta og náði að lokum að knýja fram 11 stiga sigur. Bulls-menn þurfa því að girða sig í brók fyrir fjórða leikinn ætli þeir sér ekki að missa Heat of langt fram úr sér.

Tilþrifin úr leiknum í nótt á vef NBA.