Heimsmeistarinn Sebastian Vettel á Red Bull kom fyrstur í mark í Spánarkappakstrinum í Formúlu 1 sem lauk í Barcelona í dag. Þetta er fjórði sigur Vettels í fyrstu fimm keppnum ársins.

Vettel átti í harðri baráttu við Lewis Hamilton á McLaren en á endanum hafði heimsmeistarinn betur eins og svo oft áður á þessu keppnistímabili.

Jenson Button á McLaren náði þriðja sætinu og Mark Webber á Red Bull, sem hóf kappaksturinn á ráspól, þurfti að sætta sig við fjórða sætið. Ferrari-maðurinn Fernando Alonso endaði fimmti.