Zach Randolph skoraði 31 stig og tók 11 fráköst í sjötta leik Memphis Grizzlies og San Antonio Spurs í úrslitakeppni NBA í nótt. Memphis kom inn í úrslitakeppnina í 8. og síðasta sæti Vesturdeildarinnar en San Antonio var með einn besta árangur allra liða í NBA-deildinni á leiktíðinni og skipaði því 1. sæti í villta Vestrinu.

Memphis gerði sér lítið fyrir og sló út stórlið San Antonio með því að vinna leikinn í nótt og seríuna 4-2. Randolph var óstöðvandi í fjórða leikhluta í nótt og skoraði 16 af 31 stigi sínu í þeim leikhluta. Memphis með frábæran 99-91 sigur.

Tony Parker var stigahæstur hjá Spurs með 23 stig, Manu Ginobili skoraði 16 en Tim Duncan aðeins 12.

Þetta var fyrsti sigur Memphis í úrslitakeppnisrimmu frá upphafi en San Antonio Spurs ollu miklum vonbrigðum í seríunni.

Memphis mætir Oklahoma City Thunder í næstu umferð sem hefst á sunnudaginn. Dallas mætir meisturum Los Angeles Lakers í hinni rimmunni í Vesturdeildinni.

Á Austurströndinni mæta Atlanta Hawks spútnikliði Chicago Bulls á meðan stjörnum prýdd lið Boston Celtics og Miami Heat eigast við.