Bardagaíþróttakappinn Gunnar Nelson keppir í sínum fyrsta bardaga í blönduðum bardagalistum, MMA, í tæpt eitt og hálft ár í febrúar á næsta ári. Bardagi hans verður aðalatriðið á næsta kvöldi Cage Contender-bardagaraðarinnar sem fer fram þann 25. febrúar í Dyflinni á Írlandi.

Þetta staðfestir faðir hans og umboðsmaður, Haraldur Dean Nelson, við bardagafréttavefinn MMAViking.com. Ekki hefur verið ákveðið hver mætir Gunnari en síðast þegar hann keppti á Cage Contender niðurlægði hann Bretann Danny Mitchell með því að hengja hann í fyrstu lotu.

Gunnar tók sér frí frá keppni í MMA í september í fyrra eftir að hafa rúllað upp einni vonarstjörnu Breta, Eugene Fadiora, með því að hengja hann í fyrstu lotu á BAMMA-bardagamótaröðinni. Hann hefur eytt síðasta ári í æfingar en keppt bæði í gólfglímu og brasilísku jiu-jitsu með góðum árangri.