Ökuþórinn Sebastian Vettel tryggði sér í morgun heimsmeistaratitilinn í Formúlu 1-kappakstrinum. Hampar hann titlinum annað árið í röð. Með sigrinum í ár hefur Vettel skráð nafn sitt á spjöld sögunnar sem yngsti tvöfaldi heimsmeistarinn frá upphafi Formúlu 1-keppninnar. Vettel er ekki nema 24 ára og 98 daga gamall.

Sigurinn tryggði Vettel sér á Suzuka-brautinni í Japan. Hann vann þó ekki keppnina heldur kom þriðji í mark á eftir Jenson Button, hjá McLaren, og Fernando Alonso, hjá Ferrari. Félagi hans úr Red Bull-Renault-liðinu var svo fjórði maður í mark en með stigunum komu þeir liði sínu í enn öruggari stöðu á toppi stigalista bílaframleiðanda.