Ólafur Þórðarson hefur verið ráðinn þjálfari 1. deildar liðs Víkings en Víkingar féllu úr Pepsi-deildinni í ár. Þetta var opinberað á lokahófi félagsins í gærkvöldi. Hann gerir þriggja ára samning við Víking.

Ólafur sagði starfi sínu lausu hjá Fylki fyrir lokaumferðina í gær þar sem Árbæjarliðið tapaði gegn FH, 5-3. Hann hefur stýrt Fylki í þrjú ár og náði best þriðja sætinu árið 2009.

Áður hefur Ólafur þjálfað ÍA, sem hann gerði að Íslandsmeisturum árið 2001, og Fram en hann var aðeins eitt ár í Safamýrinni, tímabilið 2007.

Helgi Sigurðsson verður spilandi aðstoðarþjálfari en Helgi lék lykilþátt í því að koma liðinu upp úr 1. deildinni í fyrra. Hann gat þó lítið verið með í ár vegna meiðsla.