Fyrrverandi landsliðsþjálfarinn í fótbolta, Ólafur Jóhannesson, skrifaði í dag undir þriggja ára samning við Hauka og stýrir liðinu í 1. deildinni á komandi tímabili. Á sama tíma var tilkynnt að Sigurbjörn Hreiðarsson yrði spilandi aðstoðarmaður Ólafs.

Ólafur tekur við starfinu af Magnúsi Gylfasyni sem hélt til Eyja eftir tímabilið og tók þar við starfi Heimis Hallgrímssonar en hann var á dögunum ráðinn nýr aðstoðarþjálfari landsliðsins.

Ólafur hefur stýrt íslenska landsliðinu undanfarin fjögur ár en síðasti leikur hans með Ísland var 5-3 tapið gegn Portúgal ytra á dögunum.

Hann gerði FH að Íslandsmeisturum þrjú ár í röð frá 2004-2006 áður en hann var ráðinn landsliðsþjálfari Íslands.

Haukar enduðu í þriðja sæti 1. deildar á síðasta ári undir stjórn Magnúsar Gylfasonar.