Leikir fyrstu tveggja vikna NBA-deildarinnar í körfubolta hafa verið felldir niður og verða ekki leiknir. Engin lið eru komin saman til æfinga þar sem eigendur liðanna og leikmenn komast ekki að samkomulagi um peningamálin en samningur á milli þessara aðila, þar sem hvert einasta smáatriði er skráð, rennur út í lok tímabilsins.

David Stern, framkvæmdastjóri NBA-deildarinnar, fundaði með sínum mönnum og leikmannasamtökunum allan sunnudaginn og mánudaginn þar sem reynt var að komast að samkomulagi svo fyrsti leikdagur, 1. nóvember, stæði. Það tókst ekki og sagði Stern eftir fundinn að langt væri í að samningar næðust. Fyrstu tvær vikurnar af tímabilinu eru farnar og með hverjum deginum sem líður mun þurfa að fella niður fleiri leiki. Síðast þegar svona mál kom upp, árið 1998, spiluðu liðin aðeins 50 leiki af 82.

Eigendurnir vilja breytingar
Eigendur NBA-liðanna vilja í grunninn halda áfram að græða en eru ekki jafnreiðubúnir að deila hagnaðinum með leikmönnunum eins og áður. Leikmennirnir eru aftur á móti afar sáttir við sinn hlut eins og staðan er og skyldi engan undra. Leikmenn sem eru ekkert meira en ágætir og eru jafnvel bekkjarmatur hjá sínum liðum fá sumir borgað upp undir 10 milljónir dollara á ári.

Samkvæmt samningnum, sem á ensku er kallaður „collective bargaining agreement“ eða CBA, fá leikmenn deildarinnar 51 prósent allra tekna sem tengjast körfuboltanum vegna klausu sem heitir BRI eða „basketball related income“. Þessu vilja eigendurnir breyta. BRI-klausan nær yfir næstum hvern einasta tekjulið, allt frá bílastæðagjöldum upp í sjónvarpstekjur.

Eigendurnir benda á að BRI-formúlan sé innifalin í heildarmyndinni, ekki bara tekjum, hún nær einnig yfir kostnað. Þannig að þegar eigendur eyða fjármagni aukalega í auglýsingar til að auka miðasölu tapa þeir fé án þess að það komi niður á leikmönnum. Þetta er ein ástæða þess að liðin í NBA-deildinni töpuðu 370 milljónum dollara á síðasta tímabili, samkvæmt bókhaldi deildarinnar.

Leikmannasamtökin bera brigður á þessar upplýsingar og saka eigendurna um að hagræða bókhaldinu til að fá þessa niðurstöðu. Margir NBA-spekingar ytra halda að leikmennirnir hafi nokkuð til síns máls í þeim efnum og benda á að lið eins og Golden State Warriors, sem er nú ekki hátt skrifað, hafi rakaði inn 450 milljónum dollara á síðasta tímabili.

Styttri samningar
Eigendur NBA-liðanna vilja einnig að meðallaun leikmanna sem eru hirtir upp á frjálsri sölu geti aðeins búist við mest þriggja milljóna dollara samningi en ekki 5,8 milljónum eins og staðan er í dag. Þá vilja eigendurnir einnig að ekki verði hægt að gera lengri samning en til tveggja ára við þannig leikmenn.

Þá vilja þeir einnig að ekki verði hægt að endursemja við eigin leikmenn til lengri tíma en fjögurra ára og aðeins til þriggja ára við leikmenn sem eru nýkomnir frá öðrum liðum. Leikmannasamtökin vilja ekki skemmri tíma en fimm og fjögur ár hvað þessa hluti varðar. Eins og staðan er núna mega lið endursemja við sína eigin leikmenn til sex ára og gera samninga til fimm ára við nýja leikmenn.

Launaþak hefur verið í deildinni síðan árið 1983 en ein góð leið til að komast hjá því er einmitt falin í því að semja við leikmenn sem nú þegar eru hjá liðunum. Þegar samið er við leikmann sem nú þegar er hjá liðinu má borga honum hvað sem er. Þetta var eitt af deilumálunum sem mikið voru rædd á fundi deiluaðila á sunnudag og mánudag en ekkert þokaðist í samningaviðræðunum.

Herða launaþakið
Til þess að losa sig undan „Larry Bird“-undanþágunni vilja eigendur liðanna herða launaþakið í deildinni til muna þannig að lið geti ekki boðið leikmönnum einum dollara meira en rúmast undir þaki liðsins. Ekki einu sinni þegar þeir eru að endursemja við sína eigin leikmenn.

Leikmannasamtökin hafa í samráði við leikmennina heitið því að sættast aldrei á hert launaþak. Það gerðu leikmenn í NHL-deildinni einnig og vegna þess var ekkert íshokkí spilað í Bandaríkjunum 2004–2005. Eftir það sættust leikmennirnir á hert launaþak.

Það er þó afskaplega góð ástæða fyrir því að leikmennirnir vilja ekki hert launaþak og hún er auðvitað sú að leikmenn margir hverjir geta fengið greitt eins og liðin hafa efni á. Leikmaður á borð við Drew Gooden fær 32 milljónir dollara fyrir fimm ára samning og Joe Johnson fékk nýjan 120 milljóna dollara samning þegar hann var orðinn 35 ára. Menn hafa það því gott og vilja engu breyta en skiljanlega vilja eigendurnir stöðva þetta.

Niðurfelling leikja truflar samningaviðræður
„Með hverjum deginum sem líður munum við þurfa að blása fleiri leiki af,“ segir David Stern, framkvæmdastjóri NBA-deildarinnar. Eftir fundinn á mánudagskvöldið leiddi Stern að því líkur að tilboð eigendanna til leikmanna gætu jafnvel orðið lægri og möguleikar til að bæta upp tapið vegna leikjanna sem nú þegar er búið að fella niður versnað.

Leikmennirnir vilja meina að forsvarsmenn deildarinnar séu einfaldlega að bíða eftir því að launaseðlarnir hætti að koma til leikmannanna og þá muni þeir sætta sig við hvað sem er. Þeir standa þó fast á sínu og ætla sér ekki að leyfa eigendunum að komast einu sinni hálfa leið með það sem þeir vilja.

Billy Hunter, framkvæmdastjóri leikmannasamtakanna, rifjaði upp orð Davids Stern fyrir nokkrum árum er hann sagði: „Eigendurnir verða að koma þessu í gegn.“ Hunter svaraði honum ákveðinn: „Eina leiðin fyrir eigendurna til að fá öllu sínu framgengt er að loka fyrir NBA-deildina í eitt til tvö tímabil.“ Hunter bætti þó við að Stern ýjaði að því að svo gæti vel farið. Það gæti verið ansi langt í að leikmenn í NBA-deildinni heilli heimsbyggðina á fjölum hallanna um gervöll Bandaríkin.