Það hefur lengi verið vitað mál að gamla góða peningatréð gefur vel af sér í ensku úrvalsdeildinni. Sumir vilja jafnvel ganga svo langt að segja að leikmenn úrvalsdeildarinnar taki ofurlaunum sínum sem sjálfsögðum hlut. Í bandarísku MLS-deildinni er hlutunum háttað öðruvísi. Þar eru leikmenn nánast undir fátæktarmörkum.

Á meðan fótboltaáhugamönnum í kreppuhrjáðum löndum berast fréttir af því að leikmenn á borð við Joe Cole og Shaun Wright-Phillips séu hundfúlir með að þéna „aðeins“ 80 þúsund pund á viku í samningaviðræðum við lið sín fyrir að spila smá fótbolta við og við, þá íhugar leikmannasamband MLS-deildarinnar að fara í verkfall vegna lágra launa.

Fram hefur komið að 26 MLS-leikmenn þéni aðeins rúmlega 13 þúsund pund á ári (um 2,3 milljónir íslenskar).Í ljósi þess að meðaltal árslauna Bandaríkjamann eru um 33 þúsund pund þá má sjá að atvinnumennirnir eru vel undir sultarmörkum miðað við meðaltalið.