Spænskir blaðamenn eru allt annað en sáttir við frammistöðu Real Madrid í Meistaradeildinni eins og sést kannski best á forsíðum spænskra dagblaða í dag. Þar eru orð eins “martröð”, “stórslys” og “hamfarir” áberandi.

Eitt útbreiddasta dagblað Spánar, Marca, fullyrðir að þess verði skammt að bíða áður en Manuel Pellegrini verði gefinn reisupassinn. Þar stendur á meðal annars á forsíðu: „Bless Pellegrini“. Í frétt blaðsins um leik Real Madrid og Lyon, sem endaði 1:1, kemur meðal annars fram að sagan endalausa endurtaki sig í sífellu.

„Sama uppnámið ár eftir ár. Real Madrid brotlendir í sextán liða úrslitum. Lyon slæst þar með í hóp með Madridar-böðlunum Juventus, Arsenal, Bayern Munchen, Roma og Liverpool.“ Þessi sex félög hafa öll slegið Real Madrid úr keppni í sextán liða úrslitunum undanfarin ár.

Aðrir fjölmiðlar taka í sama streng. Á forsíðu AS er fyrirsögnin “stórslys” og því lýst hvernig Lyon hafi átt skilið að fara áfram úr einvíginu. El Mundo Deportivo, sem hefur aðsetur í Barcelona, snéri hnífnum í sári Real Madrid-manna með því að segja að Barcelona gæti hæglega lyft Evrópumeistaratiltinum á heimavelli Real Madrid í maí.