Stjórn Dansíþróttasambands Íslands hefur útnefnt Sigurð Má Atlason og Söru Rós Jakobsdóttur sem dansara ársins 2010. Þetta er í þriðja sinn sem þau hreppa þessa útnefningu. Þau dansa fyrir Dansíþróttafélag Hafnarfjarðar og hafa gert þá frá árinu 2000. Í gegnum árin hafa þau bæði unnið Íslands- og Bikarmeistaratitla í flokkum unglinga, ungmenna og fullorðinna. Þau hafa einnig verið fulltrúar Íslands á heims- og evrópumeistaramótum og keppt á fjölda alþjóðlegra stórmóta.

Á árinu 2010 náðu þau alltaf í verðlaunasæti á íslenskum keppnum og urðu þau Íslandsmeistarar í standard dönsum ungmenna og í öðru sæti í flokki fullorðinna, í öðru sæti í latin dönsum í flokki ungmenna og í öðru sæti í flokki fullorðinna. Þau urðu einnig Íslandsmeistarar í flokki ungmenna og flokki fullorðinna í 10 dönsum. Sigurður og Sara keppa í efsta styrkleikaflokki. Þeirra besti árangur erlendis á árinu var 12. sæti á heimsmeistaramóti ungmenna í latin dönsum sem fram fór í Linz í Austurríki þann 24. apríl síðastliðinn.