Birgir Leifur Hafþórsson, kylfingur úr GKG, hefur leik næsta laugardag á lokastigi úrtökumótsins fyrir Evrópumótaröðina í golfi, þá næststærstu í heiminum. Birgir Leifur lauk í gær leik á öðru stigi úrtökumótsins en hann náði þar þeim glæsilega árangri að verða í öðru sæti á móti sem fram fór á Arcos Garden-vellinum við suðurströnd Spánar. Birgir Leifur lék hringina fjóra samtals á sex höggum undir pari en lokahringinn lék hann á fjórum undir. Veður setti strik í reikninginn en ekki náðist að ljúka mótinu fyrr en í gær en Birgir Leifur átti þá eftir tíu holur. Þar small allt saman og landaði hann öðru sætinu sem tryggir honum keppnisrétt á lokaúrtökumótinu og 150.000 krónum í verðlaunafé.

Spilaði vel allt mótið
Birgir Leifur var nýbúinn að frétta að hann hefði náð öðru sætinu þegar DV náði á hann en hann sat þá á flugvelli og beið eftir flugi til Barcelona þar sem lokaúrtökumótið fer fram. „Ég er alveg í skýjunum. Það var virkilega gaman að komast í gegnum þetta og klára mótið með stæl,“ segir Birgir Leifur. „Ég spilaði vel allt mótið og nokkuð stöðugt. Ég get ekki annað en verið rosalega sáttur,“ segir hann