Tiger Woods hefur ekki getað glaðst yfir miklu undanfarna daga. Hann getur þó huggað sig með því að afrek hans á golfvellinum eru ekki gleymd. Associated Press-fréttastofan útnefndi hann nefnilega íþróttamann áratugarins í dag.

Woods fékk 56 af 142 atkvæðum ritstjóra AP.

Woods státar af merkilegum áratug enda vann hann á þeim tíma 64 mót, þar af 12 risamót í golfi. Hann tapaði aðeins einu sinni eftir að hafa farið inn í lokaumferð móts með forystuna. Og aðeins fjórir kylfingar hafa unnið fleiri PGA sigra á ferlinum en Woods vann á þessum áratug.

Hjólreiðakappinn Lance Armstrong varð í öðru sæti kjörsins með 33 atkvæði, tennisleikarinn Roger Federer endaði í þriðja og sundkappinn Michael Phelps því fjórða.