Oscar Pistorius, fatlaður spretthlaupari frá Suður-Afríku sem hleypur á gervilimum frá íslenska fyrirtækinu Össur HF, vann hundrað metra hlaup í flokki T44 á Ólympíumótinu í Peking í dag.

Pistorius reyndi hvað hann gat að fá keppnisleyfi í 400 metra hlaupi á Ólympíuleikum ófatlaðra sem haldnir voru í ágúst en fékk ekki leyfi frá alþjóða Ólympíunefndinni.

Hann hljóp í dag á 11,17 sekúndum og varð þremur hundruðustu á undan Jerome Singelton frá Bandaríkjunum.

Pistorius á enn eftir að keppa í 200 og 400 metra hlaupi.

Keppt er í nokkrum flokkum í hundrað metra hlaupi og á okkar maður, Jón Oddur Halldórsson, enn eftir að keppa í sínum flokki.