Alex Ferguson, knattspyrnustjóri Manchester United, ætlar ekki að taka neina áhættu þegar hans menn mæta dönsku meisturunum í AaB Álaborg í kvöld. Ferguson á ekki góðar minningar frá heimsóknum sínum til Danmerkur því United liðið tapaði árið 2006 fyrir FC Kaupmannahöfn.

Ferguson sagði á blaðamannafundi fyrir leikinn í gær að sínir menn vanmeti dönsku meistarana ekki. Þá sagðist hann ætla að spila öllum sínum bestu mönnum. „Ég er ekki hræddur um vanmat hjá mínum mönnum. Við gerðum mistök gegn FC Kaupmannahöfn og enduðum á að rétt komast áfram. Í þetta skiptið mun ég spila mínum bestu mönnum,“ segir Ferguson.

Það þýðir að Cristiano Ronaldo, Dimitar Berbatov, Wayne Rooney og Paul Scholes spila væntanlega í kvöld. Eftir jafnteflið í fyrsta leik gegn Villarreal veit Ferguson að United liðið hefur ekki efni á að misstíga sig í kvöld.