Knattspyrnudómarinn Rob Styles sem dæmdi leik Manchester United og Bolton í ensku úrvalsdeildinni um helgina hefur beðið Bolton afsökunar á vítaspyrnunni sem hann dæmdi gegn þeim þegar Jlloyd Samuel "braut" á Cristiano Ronaldo innan vítateigs.

Augljóst var að ekki var um víti að ræða og sá Styles það eins og allir aðrir á myndbandi eftir leikinn sem Manchester United vann 2-0. Athygli vakti einnig hversu langan tíma Styles tók í að benda á punktinn eftir að hann flautaði.

Gary Megson, þjálfari Bolton, sagði eftir leikinn: „Þetta var bull og kjaftæði. Ég hélt að hann ætlaði að spjalda Ronaldo fyrir leikaraskap sem hefði einnig verið rangur dómur.“