Keflavík getur orðið Íslandsmeistari í knattspyrnu karla í kvöld sitjandi heima með öl í annari og snakk í hinni. FH tekur á móti Breiðabliki á þeim athyglisverða tíma, 16:30, og takist Hafnfirðingum ekki að sigra er Keflavík orðið meistari án þess að snerta fótbolta.

Þetta er ekki algengt að gerist á Íslandi enda tvær síðustu umferðirnar alltaf leiknar á sama tíma. Vegna Evrópuþátttöku FH í ár eiga þeir hins vegar þennan leik gegn Breiðabliki eftir. FH þarf líka að hugsa um markatöluna en vinni þeir næstu tvo leiki sína og Fram nær jafntefli við Keflavík í lokaumferðinni ræðst Íslandsmótið á markatölu. FH hefur 15 mörk í plús en Keflavík 18 mörk.