FH á ennþá möguleika á Íslandsmeistaratitlinum eftir léttan, 3-0, sigur á Blikum í Krikanum í dag. Atli Viðar Björnsson skoraði tvö mörk fyrir FH og Atli Guðnason eitt í sigri sem hefði getað orðið stærri.

FH-ingar leiddu 3-0 í leikhléi og fengu fleiri færi til þess að skora í þeim síðari. Blikar fengu líka upplagt tækifæri til að laga stöðuna þegar Jóhann Berg Guðmundsson fékk vítaspyrnu. Hann tók spyrnuna sjálfur og lét Gunnar Sigurðsson verja frá sér.

FH hefði þurft eitt mark til viðbótar til að jafna Keflavík að markatölu. FH-ingar þurfa nú að vinna Fylki í lokaumferðinni með tveimur mörkum og vonast til þess að Fram taki allavega stig af Keflavík í Keflavík.