Sir Alex Ferguson, stjóri Manchester United hefur sullað olíu á eldinn í aðdraganda stórleiks helgarinnar þar sem lærisveinar hans mæta á Stamford Bridge og leika gegn Chelsea.

Ferguson vill meina að Arsenal sé stærri klúbbur en Chelsea, og mun líklega afla sér fárra stuðningsmanna meðal áhangenda Chelsea með þeirri yfirlýsingu, enda Arsenal og Chelsea svarnir óvinir.

Leikur Chelsea og Manchester United fer fram á sunnudaginn.

Þrátt fyrir að liðin hafi háð harða baráttu undanfarin ár um titilinn segir Ferguson að heilt yfir verði Arsenal að teljast stærsti andstæðingur United í deildinni undanfarin 12-13 ár.