Sætaskipti urðu á toppi ensku úrvalsdeildarinnar eftir leiki dagsins. Arsenal sigraði Bolton örugglega á útivelli 1-3 á meðan Liverpool gerði aðeins markalaust jafntefli gegn Stoke City á Anfield.

Leikmenn Arsenal sýndu sínar bestu hliðar á Rebook vellinum í dag. Bolton skoraði fyrst á en gestirnir skoruðu 3 mörk í kjölfarið og hefðu hæglega getað skorað fleiri. Með sigrinum komst Arsenal í toppsæti deildarinnar með 12 stig.

Stoke City gerði góða ferð á Anfield Road í Liverpool og vann frækinn varnarsigur með því að ná jafntefli geng sterku liði heimamanna sem voru miklu betri í leiknum. 27 marktilraunir Liverpool gegn 3 hjá Stoke segir allt sem segja þarf um leikinn.

Giofranco Zola fékk sannkallaða draumabyrjun sem stjóri West Ham þegar lið hans vann öruggan 3-1 heimasigur á Newcastle og loks vann Blackburn góðan heimasigur á móti Fulham 1-0.