Kimi Raikkonen er sama og úr leik um heimsmeistaratitilinn í Formúlu 1 eftir að hafa ekki náð í stig í síðustu keppni. Hann var grátlega nálægt því að landa sigri á Spa-brautinni fyrir tveimur vikum en allt kom fyrir ekki.

,,Ég er búinn að gefa allt mitt í þetta en það er eins og ekkert gangi," segir núverandi heimsmeistarinn um stöðu sína í keppninni þar sem hann situr í 4. sæti.

,,Það er kominn langur tími síðan ég vann síðast og listinn yfir keppnir sem ég hef ekki náð í stig í er að stækka. Að fara í gegnum fimm keppnir án þess að ná í stig er mjög mikið. Það þarf engan Einstein til að sjá að það gengur ekki í baráttunni um titilinn," segir Raikkonen.

,,Þetta er samt ekki búið ennþá en ég þarf kraftaverk. Eins og ef elding fellur tvisvar á sama staðinn."