Bandaríski markvörðurinn Brad Friedel sem genginn er í raðir Aston Villa frá Blackburn segir að hann hafi ekki yfirgefið félagið vegna ráðningar Paul Ince sem knattspyrnustjóra liðsins.

Um leið og gengið var frá 2.5 milljón punda félagaskiptum hans til Aston Villa var strax talið að hann vildi ekki leika undir stjórn Paul Ince. Það segir Friedel hins vegar ekki rétt. Það hefði engu breytt þó Mark Hughes væri áfram knattspyrnustjóri liðsins, Friedel vildi nýja áskorun á sínum ferli.

,,Þetta kom engan veginn því við að Ince varð knattspyrnustjóri," segir Friedel í dag og ítrekar að Ince vildi halda honum og bauð honum nýja og betri samning.