FH komst áfram í UEFA-bikarnum í kvöld eftir glæsilegan 5-1 stórsigur á Grevenmacher í Lúxemborg.

Tryggvi Guðmundsson og Atli Guðnason skoruðu báðir tvö mörk fyrir FH og Björn Daníel Sverrisson bætti því fimmta við.

Fyrri leikur liðanna á Kaplakrikvelli fór 3-2 fyrir FH og fara FH-ingar því áfram í aðra umferð forkeppninnar með samanlögðum sigri 8-3

Tæpt á Skaganum
Litlu mátti muna að Skagamenn næðu að vinna upp þriggja marka forskot Honka frá Finnlandi á Akranesvelli í kvöld þegar liðið hafði betur í viðureign liðanna, 2-1.

Helgi Pétur Magnússon kom Skagamönnum yfir á 15. mínútu og Björn Bergmann Sigurðsson bætti við öðru marki á þeirri 49.

Honka náði hins vegar að minnka muninn á 72. mínútu, þvert gegn gangi leiksins, og þar við sat. 2-1 á Akranesi og Finnarnir fara áfram 4-2 í það heila.