Forráðamenn Aston Villa hafa staðfest að fyrirliði liðsins, Gareth Barry, verði hjá liðinu á komandi leiktíð í ensku úrvalsdeildinni og ekkert verði af fyrirhuguðum kaupum Liverpool á leikmanninum.

Segja forráðamenn Villa að Liverpool-menn hafi ekki náð að klára kaupin á Barry fyrir tilskilinn frest sem liðið hafði gefið.

Talið er að Aston Villa hafi krafist 18 milljóna punda fyrir Barry og sá biti reyndist Liverpool um of, sérstaklega í ljósi þess að liðið keypti í gær Robbie Keane fyrir rúmlega 20 milljónir punda. Rafa Benitez stjóri Liverpool hafði áður sagt að liðið yrði að selja leikmenn til að fjármagna kaupin á Barry en nú virðist Aston Villa hafa slegið öllu í lás.

Spurning er hvernig stuðningsmenn Aston Villa taka Barry á komandi vikum og mánuðum, en eins og greint hefur verið frá bauluðu þeir á hann í hvert skipti sem hann snerti boltann í vináttuleik á dögunum.