Ítalska blaðið La Gazzetta dello sport heldur því fram að Ferrari muni nota nýja vélarhlíf sem það kallar "hákarlauggann" í Ungverjalandskappakstrinum um næstu helgi en liðið prófaði hana í Jerez í síðustu viku.

Ugginn sem er upphaflega hönnun Red Bull-liðsins gerir F2008 bíl Ferrari sem Felipe Massa og heimsmeistarinn Kimi Raikkonen stöðugri. McLaren, Toyota og Honda hafa einnig prófað þessa nýju vélarhlíf en eru ekki líkleg til að taka hana upp á næstunni.

Talið er að Ferrari muni einnig nota "hákarlauggann" í Valencia í næsta mánuði en líklega ekki á Spa-brautinni né Monza því þær eru svo hraðar.

,,Titilbaráttan er ennþá opin upp á gátt og við munum prófa allt til að ná okkar markmiðum," segir Felipe Massa sem prófaði vélarhlífina síðastliðinn föstudag.