Franski miðvallarleikmaðurinn Claude Makelele hefur yfirgefið herbúðir Chelsea til að ganga til liðs við franska liðið Paris st. Germain. Þessi 35 ára Frakki gekk til liðs við Chelsea frá Real Madrid árið 2003 á 16,8 milljónir punda og er án nokkurs vafa einn albesti miðvallarleikmaðurinn í sögu ensku úrvalsdeilarinnar.

Makelele vann deildina tvisvar með Chelsea og lék 217 leiki með liðinu en í þeim skoraði hann tvö mörk. Chelsea sendi frá sér yfirlýsingu vegna leikmannsins þar sem fram kemur að félagið vilji þakka Makelele fyrir vel unnin störf hjá félaginu.

„Allir hjá Chelsea vilja þakka Claude fyrir þá þjónustu sem hann hefur veitt.
Claude hefur verið lykilmaður í velgengni Chelsea undanfarin ár og við óskum honum velfarnaðar í framtíðinni. Hann verður ávallt velkominn aftur á Stamford Bridge, sem leikmaður eða vinur félagsins.“

Síðasti leikur Makelele fyrir Chelsea var tapleikurinn gegn Manchester United í úrslitum Meistaradeildarinnar í vor.