Markvörðurinn Gunnar Sigurðsson tók nýlega fram skóna að nýju eftir tveggja ára hvíld. Hann hefur leikið undanfarna tvo leiki með FH og staðið sig mjög vel. Gegn HK varði hann eins og berserkur og virtist í fantaformi. „Æfingarnar voru mjög erfiðar til að byrja með, en núna er ég orðinn léttari en þegar ég var að spila áður. Kominn undir 90 kílóin og allt,“ segir Gunnar í gamansömum tón.
Gunnar var lengstum á bekknum í sumar og er sáttur við sína stöðu. „Ég var fengin til að setja pressu á Daða (Lárusson) og var alveg sáttur við mína stöðu á bekknum, svo meiðist hann og ég fékk að spila þessa tvo leiki. Það var mjög gaman.“
Gunnar segist lítið hafa breyst og formið sé alltaf gott. „Ég þarf kannski aðeins meiri hvíld eftir leikina en fyrir utan það hefur lítið breyst, formið er gott,“
segir Gunnar.
Hann segist ekki gera kröfu á byrjunarliðssæti þrátt fyrir góða frammistöðu í síðustu leikjum en nú styttist í að Daði Lárusson verði heill heilsu. „Ég er alveg sáttur við það hlutverk sem Heimir (Guðjónsson) lætur mig fá. Hans er að taka ákvörðun um það sem hann vill gera,“ segir gamli refurinn Gunnar Sigurðsson sem er 33 ára gamall.