Arnar og Bjarki Gunnlaugssynir verða ekki með ÍA í næsta leik taki þeir við liðinu eins og reiknað er fastlega með. Heiðursmannasamkomulag hefur verið gert á milli ÍA og FH.

Þetta kemur fram á Vísi.is og þar segir Pétur Stephensen framkvæmdastjóri FH: „Það var heiðursmannasamkomulag um að þeim yrði sleppt ef Skaginn vildi fá þá. Það er að vissu leyti leiðinlegt að næsti leikur okkar sé gegn ÍA en það er hluti af samkomulaginu að þeir stýri ÍA ekki gegn okkur og leiki ekki með þeim í leiknum."

Arnar og Bjarki tóku einnig við liðinu í erfiðri stöðu árið 2006 en björguðu þá liðinu frá falli og lyftu því upp í 6. sæti deildarinnar.

FH sigraði ÍA þegar liðin mættust fyrr á leiktíðinni í Kaplakrika, 2-0.