Clarence Seedorf, hollenski miðjumaðurinn hjá AC Milan, harðneitar að láta eftir númer sitt hjá liðinu eftir að Ronaldinho gekk til liðs við félagið. Seedorf hefur verið í treyju númer 10 undanfarin ár, en það númer bar Ronaldinho einnig hjá Barcelona.

Mikið auglýsingabatterí er að baki Ronaldinho sem hefur sína eigin R-10 línu hjá íþróttavöruframleiðandanum Nike og hagsmunir hans við númerið miklir.

Seedorf hefur áður komið fram í fjölmiðlum þar sem hann hefur sett sig upp á móti kaupunum á Ronaldinho og lýst því yfir að ef hann yrði keyptur, sem nú er raunin, þá myndi hann ekki láta númerið 10 af hendi.

Seedorf, sem er 32 ára, segir að hjá Milan ríki stigveldi sem Ronaldinho verði að virða.

Einn af yfirmönnum Milan, brasilíumaðurinn Leonardo, er sagður hafa tekið í taumana í von um að reyna að sannfæra Seedorf um að láta númerið af hendi. Hvort Hollendingurinn gefi eftir, á hins vegar eftir að koma í ljós.