Arnór Guðjohnsen, faðir og umboðsmaður Eiðs Smára Guðjohnsen, segir í viðtali við SkySports að Eiður hafi ekki áhuga á að ganga til liðs við Aston Villa. Eiður sé líklegri til að færa sig um set til London eða Manchester.

Eins og margoft hefur komið fram er talið næsta öruggt að Eiður Smári yfirgefi herbúðir Barcelona í sumar og eru mörg lið nefnd til sögunnar sem sögð eru hafa áhuga á Íslendingnum.

Auk Aston Villa hafa Manchester City, West Ham, Bolton og Portsmouth að sögn áhuga á Eið. Samkvæmt enskum fjölmiðlum er talið að Eið hugnist ekki að ganga til liðs við Villa af persónulegum ástæðum.

„Ég hef séð vangaveltur og slúður um Eið og Aston Villa, en ég held að honum hugnist það ekki,“ segir Arnór í viðtali við SkySports. „Ef hann snýr aftur til Englands þá myndi hann frekar vilja fara til London eða Manchester fremur en til Birmingham-borgar. Það eru nokkur félög sem hafa áhuga en ekkert meira hefur orðið úr því. “ segir Arnór Guðjohnsen.

„Ég held að hann yfirgefi Barcelona, og hann heldur ýmsum möguleikum opnum í augnablikinu.“