Gary Megson, knattspyrnustjóri enska úrvalsdeildarliðsins Bolton sem Grétar Rafn Steinsson leikur með, viðurkennir að liðið er í vandræðum en allir verði að standa saman ef bjarga á liðinu úr þeim ólgu sjó sem það er komið í. Bolton tapaði í gærkvöldi fyrir Everton þegar Belginn Marouane Fellaini skoraði sigurmarkið í uppbótartíma.

„Við höfum spilað tíu leiki og fengið aðeins átta stig, við erum augljóslega í vandræðum,“ sagði Megson eftir leikinn í gærkvöldi en Bolton er í næstsíðasta sæti úrvalsdeildarinnar. „Við verðum að fara vinna leiki. Það er alltaf erfitt að vinna leiki þegar maður skorar ekki og nú höfum við ekki skorað í sex af tíu leikjum okkar í ár.“

„Þegar við höfum fengið tækifæri til þess að skora og vinna leiki höfum við ekki nýtt þau. Þannig spilamennska kemur manni alltaf í vandræði. Við höfum talað um þetta saman í búningsklefanum og það er mikilvægt að allir standi saman. Það ætla allir að gera,“ sagði Megson.