Er þetta eitthvað sem mætti gera meira af?
Dómari í Baltimore í Bandaríkjunum hefur dæmt hinn 33 ára Johnathan Derek Simms í átján mánaða fangelsi fyrir að verða 66 ára konu, Louisu Donner, að bana í apríl 2016. Simms ók á Donner þegar hann var á flótta undan lögreglu. Auk þess þarf hann að sinna samfélagsþjónustu í 500 tíma.
Það sem er þó einna óvenjulegast við refsinguna – eða betrunina – er sú staðreynd að dómari dæmdi Simms einnig til að ganga um með mynd af Donner í vasanum næstu sex árin. Hvert sem hann fer verður hann að vera með mynd af henni á sér.
Dómari í málinu, Ronald Silkworth, sagðist hafa trú á því að Simms sæi eftir gjörðum sínum og hans gæti beðið björt framtíð. En, mikilvægt væri fyrir hann að gleyma ekki afleiðingum gjörða sinna og ein leiðin í þeirri viðleitni væri að ganga um með mynd af fórnarlambinu í málinu.
„Ég held að þú sért ekki illa innrættur einstaklingur og tel að þú eigir framtíð,“ sagði dómarinn sem hefði getað dæmt Simms í tíu ára fangelsi vegna málsins.
Sitt sýnist hverjum um þessa refsingu og eru aðstandendur Louisu í hópi þeirra sem eru ósáttir. Kerri Donner, dóttir Louisu, las upp yfirlýsingu fyrir dómi þar sem hún sagði meðal annars að dauði móður hennar hefði haft veruleg áhrif á hana. Sagðist hún telja að Simms ætti skilið að fá mun harðari refsingu.