Rosalegustu bíómyndirnar sem aldrei voru gerðar

Sum verkefnin reyndust of stór, önnur of ofbeldisfull og enn önnur of súrrealísk

Fyrir hverja bíómynd sem nær á hvíta tjaldið eru tugir, jafnvel hundruð, mynda sem deyja strax á fyrstu stigum. Stundum fá hugmyndasmiðirnir í Hollywood svo brjálæðislegar hugmyndir að ómögulegt er að hrinda þeim í framkvæmd, þótt slíkum dæmum hafi fækkað samhliða hinum ýmsu tækninýjungum.

Vefritið Business Insider tók á dögunum saman lista yfir bíómyndir sem aldrei litu dagsins ljós. Þær eiga það sameiginlegt að hafa verið mikil hugmyndafræðileg stórvirki.


Napoleon eftir Stanley Kubrick

Um hvað átti myndin að vera? Af mörgum stórvirkjum Stanley Kubrick átti Napoleon að verða það stærsta. Hann varði áratugum, með hléum vitanlega, í undirbúning myndarinnar sem átti að segja frá ævintýrum Napóleóns Bonaparte.

Hvað gerðist? Myndin Waterloo eftir Rod Steiger kom í kvikmyndahús árið 1970. Myndin sagði einmitt frá ævi og örlögum Napóleóns en þar sem myndin floppaði voru stóru kvikmyndaverin ekki reiðubúin til að taka áhættu með stórvirki Kubricks. Kubrick lést síðan eins og kunnugt er árið 1999, 70 ára að aldri.

Er líklegt að hún verði framleidd? Já, en ekki eins og Kubrick sá verkefnið fyrir sér. Steven Spielberg hefur látið hafa eftir sér að hann vilji gera Napoleon-verkefnið að veruleika, en þá í formi þáttaseríu fyrir sjónvarp en ekki sem kvikmynd. David Leland vinnur að því að endurskrifa handritið og hafa margir leikstjórar verið orðaðir við seríuna, þar á meðal Ang Lee, Ridley Scott, Rupert Sanders og Baz Luhrmann.
Þess má geta að hægt er að lesa handrit Kubrick að Napoleon á veraldarvefnum.


Justice League: Mortal eftir George Miller

Um hvað átti myndin að vera? George Miller átti að leikstýra þessu risavaxna verkefni Warner Bros. Hugmyndavinna hófst árið 2007 en þess skal getið að nýja myndin, Justice League, sem kvikmynduð var að hluta til hér á landi er ekki sú sama og þessi. Myndin átti að segja frá ævintýrum Batman, Superman og The Flash svo dæmi séu tekin og átti D.J. Cotrona að leika Superman og Armie Hammher átti að leika Batman.

Hvað gerðist? Tímasetning myndarinnar þótti óhentug. Verkfall handritshöfunda hafði áhrif og þá voru framleiðendur að vonast til þess að taka myndina upp í Ástralíu. Skattamál þar í landi settu einnig strik í reikninginn.

Er líklegt að hún verði framleidd? Zack Snyder, en ekki George Miller, var fenginn til að leikstýra DC-myndum Warner Bros og á sama tíma hefur Miller einbeitt sér að öðrum verkefnum, til dæmis Mad Max-myndunum með góðum árangri. Justice League: Mortal heyrir því sögunni til, að sinni allavega.


Dune eftir Alejandro Jodorowsky

Um hvað átti myndin að vera? Á áttunda áratug liðinnar aldar reyndi kvikmyndaframleiðandinn Arthur Jacobs að fá Alejandro Jodorwski til að taka að sér að leikstýra Dune sem byggð var á vísindaskáldsögu Franks Herberts. Myndin gerist í fjarlægju stjörnukerfi í framtíðinni og segir frá deilum tveggja fjölskyldna.

Hvað gerðist? Verkefnið var of stórt og áhættan of mikil fyrir leikstjóra eins og Jodorowski sem þótti býsna framúrstefnulegur í kvikmyndum sínum. Menn óttuðust að myndin myndi ekki höfða til nógu margra til að borga sig. Svo fór að David Lynch tók verkefnið að sér og kom myndin út árið 1984 í talsvert frábrugðinni útgáfu upphaflega var ætlað. Aðsókn var undir væntingum en myndin er í uppáhaldi hjá mörgum kvikmyndanördum enn þann dag í dag.

Er líklegt að hún verði framleidd? Dune, eins og Jodorowsky sá hana fyrir sér, heyrir sögunni til.


Gladiator 2 eftir Ridley Scott

Um hvað átti myndin að vera?Myndin átti, eins og nafnið gefur til kynna, að vera framhald af myndinni Gladiator með Russell Crowe frá árinu 2000. Óhætt er að segja að handritshöfundurinn, hinn goðsagnakenndi tónlistarmaður Nick Cave, hafi haft háleitar hugmyndir um myndina. Persóna Crowe, skylmingaþrællinn Maximus, deyr í lok Gladiator en í Gladiator 2 átti hann að vakna til lífsins og verða sjálfum Jesú að bana. Vinnuheiti myndarinnar var einmitt Christ Killer.

Hvað gerðist? Hugmyndin þótti of sturluð fyrir nokkurt kvikmyndaver.

Er líklegt að hún verði framleidd? Nei, það er afar ólíklegt.


The Conquest of Mexico eftir Werner Herzog

Um hvað átti myndin að vera? Myndin átti að segja frá nýlendusigrum Evrópumanna í Mið-Ameríku út frá sjónarhorni Asteka.

Hvað gerðist? Francis Ford Coppola reyndi að framleiða myndina á áttunda áratug síðustu aldar. Framleiðslufyrirtæki hans fór þó á hausinn eftir að myndin One From the Heart floppaði. Þar með var fjármögnun myndarinnar fyrir bí. Herzog reyndi skömmu fyrir aldamót að selja stóru kvikmyndaverunum handritið að myndinni en án árangurs.

Er líklegt að hún verði framleidd? Það þykir ólíklegt. Herzog hefur átt blómlegan feril, einkum í heimildamyndagerð, og hefur hans fyrsta og síðasta stórmynd í Hollywood líklega litið dagsins ljós. Það er myndin Rescue Dawn frá árinu 2006.


At the Mountains of Madness eftir Guillermo del Toro

Um hvað átti myndin að vera? At the Mountains of Madness átti að vera hryllingsmynd, byggð á samnefndri skáldsögu H.P. Lovecraft sem kom út árið 1931. Átti myndin að segja frá voveiflegum atburðum á Suðurskautslandinu.

Hvað gerðist? Á árunum 2006 til 2010 fékk del Toro fjármagn frá Universal til að undirbúa myndina; skrifa handrit og teikna ófreskjurnar. Tom Cruise var orðaður við aðalhlutverkið. Del Toro taldi að myndin myndi kosta 150 milljónir dala í framleiðslu og samkvæmt fjárhagsáætlun var talið að hún þyrfti að skila 500 milljónum dala í kassann til að standa undir öllum kostnaði. Þar sem myndin átti að vera hryllingsmynd, stranglega bönnuð börnum, var talið að hún myndi ekki höfða til nægjanlegra margra.

Er líklegt að hún verði framleidd? Líkurnar eru ekki ýkja miklar. Síðasta mynd del Toro, Crimson Peak, halaði aðeins inn 75 milljónir dala en kostnaður við hana nam 55 milljónum dala. Ólíklegt þykir að stóru kvikmyndaverin séu reiðubúin að leggja fjármagn í verkefnið.


Kill Bill 3 eftir Quentin Tarantino

Um hvað átti myndin að vera? Eins og nafnið gefur til kynna átti myndin að vera framhald Kill Bill-myndanna frá árunum 2003 og 2004. Myndin átti að segja frá dóttur Brúðarinnar, sem Uma Thurman lék, og viðleitni hennar til að ná fram hefndum á kvölurum móður sinnar.

Hvað gerðist? Quentin Tarantino fer sínar eigin leiðir og þessi hugmynd hefur verið á teikniborðinu í mörg ár, en aldrei orðið meira en hugmynd.

Er líklegt að hún verði framleidd? Ef Tarantino vill það mun hann fá til þess fjármagn. En Tarantino hefur sjálfur sagt að hann ætli ekki að leikstýra til dauðadags og hann vilji einnig sinna öðrum verkefnum. Spurningin er aðeins hvort hann hafi nógu mikla ástríðu fyrir verkefninu.


Megalopolis eftir Francis Ford Coppola

Um hvað átti myndin að vera? Höfundur Godfather og Apocalypse Now ætlaði að leikstýra þessu stórvirki á tíunda áratug liðinnar aldar. Myndin átti að segja frá stórhuga arkitekt og tilraunum hans til að byggja útópíska stórborg.

Hvað gerðist? Coppola eyddi ófáaum tímum í undirbúning myndarinnar og var til dæmis búinn að skrifa 212 blaðsíðna handrit. Verkefnið var sett á ís eftir hryðjuverkaárásirnar í New York árið 2001 og fljótlega upp úr aldamótum varð ljóst að ekkert yrði úr verkefninu.

Er líklegt að hún verði framleidd? Það þykir ólíklegt. Coppola er orðinn 77 ára og sinnir mun minni og færri verkefnum en áður.


Blood Meridian

Um hvað átti myndin að vera? Myndin átti að byggja á samnefndri skáldsögu Pulitzer-verðlaunahöfundarins Cormacs McCarthy. Bókin, sem er talin ein sú besta af mörgum góðum eftir McCarthy, segir frá blóðbaði sem átti sér stað í Bandaríkjunum um miðja nítjándu öld þegar indjánar voru ofsóttir og drepnir í hundraðatali.

Hvað gerðist? Fyrir það fyrsta er bókin afar ofbeldisfull. Nokkrir leikstjórar og leikarar hafa reynt að koma mynd á koppinn en enn sem komið er hafa þær tilraunir ekki borið ávöxt. Tommy Lee Jones reyndi það um miðjan tíunda áratuginn en kvikmyndaverin vildu stilla ofbeldinu í hóf. Ridley Scott reyndi nokkrum árum síðar en bitbeinið var handritið sem þótti of ofbeldisfullt, að mati Paramount. James Franco hefur undanfarin misseri unnið að undirbúningi myndarinnar og er hann sagður hafa sannfært Russell Crowe um að taka að sér hlutverk. Síðar kom í ljós að Franco hafði aldrei öðlast útgáfuréttinn að myndinni.

Er líklegt að hún verði framleidd? Það er ekki ósennilegt. Franco, sem er aðeins 38 ára, hefur reynt ýmislegt til að koma sögunni á hvíta tjaldið og ekki þykir ólíklegt að það takist. Reynsluleysi Franco í leikstjórastólnum og dræmar viðtökur við þeim myndum sem hann hefur leikstýrt hafa þó valdið kvikmyndaáhugamönnum ákveðnum áhyggjum.

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.