Ófáir vinir Ragndísar Hilmarsdóttur urðu logandi hræddir þegar hún deildi á sunnudaginn mynd þar sem ekki var betur séð en að sýndi draug í glugga á heimili hennar á Sauðárkróki. Margir voru á því að myndin væri „spúkí“ og var henni jafnframt deilt innan Facebook-hóps þar sem Íslendingar segja draugasögur.
Ekki er þó allt sem sýnist því í samtali við DV segir Ragndís að myndin hafi raunar verið hálfgert prakkarastrik hjá sér. „Þetta var sett inn sem smá djókur. Þannig er að litla stelpan mín átti afmæli og var öll klístruð í framan og á höndunum. Ég var með hana upp í glugga og var að sýna henni skreytingarnar í garðinum fyrir veisluna og hún klístrar allan gluggann út bæði af höndum og andliti. Ég tók ekki eftir því.
Svo daginn eftir var ég út í garði að tala við manninn minn sem var í glugganum og sá þá þetta andlit sem mér fannst svolítið krípí. Hann manaði mig að setja þetta á netið og sjá viðbrögðin sem kæmu,“ segir Ragndís og bætir við að hún finni fyrir allskonar öndum í húsinu en þeir séu sér ekkert til ama.
„Þetta var of gott til að sleppa því.“