Flórensbúar heyja árlegt blóðbað – Mussolini endurvakti siðinn
Calcio storico (sögulegur fótbolti) heitir íþróttaviðburður sem haldinn er í ítölsku borginni Flórens á hverju sumri. Leikurinn er nokkurs konar blanda af hefðbundnum fótbolta, ruðningi og bardagaíþróttum. Hann á rætur sínar að rekja til miðrar 16. aldar þegar borgarbúar stunduðu hann í umsátri hins heilaga keisaraveldis og Spánverja.
Leikurinn var vinsæll í borginni alla 16. öldina en virðist hafa gleymst á 17. öld. Það var einræðisherrann Benito Mussolini sem endurvakti siðinn til að hampa fornri frægð borgarinnar. Síðan þá hefur leikurinn verið spilaður næstum árlega.
Borgarbúar flykkjast á Piazza Santa Croce til að fylgjast með fjórum hverfaliðum borgarinnar etja kappi, það eru rauðir, bláir, grænir og hvítir. Undanúrslit fara fram snemma í júní en úrslitaleikurinn sjálfur 24. júní, á dýrlingadegi Jóhannesar skírara.
Leikurinn er spilaður á ferhyrntum sandvelli með netum á hvorum enda og leikmenn skora mörk með því að koma boltanum yfir vegg í net andstæðinganna. 27 leikmenn eru í hvoru liði, allir inn á í einu og engar skiptingar eru leyfðar jafnvel þó einhver slasist (sem gerist mjög reglulega). Leiktíminn er 50 mínútur.
Calcio Storico er gríðarlega ofbeldisfull íþrótt og fjölmargir leikmenn hafa slasast og þurft að dveljast mánuðum saman á sjúkrahúsi. Enginn hefur þó látist síðan leikurinn var endurvakinn fyrir tæplega 90 árum síðan.
Það eru til reglur sem eiga að halda meiðslum í lágmarki. Þær segja til dæmis að ekki megi sparka í höfuð leikmanna og að tveir eða fleiri megi ekki ráðast á einn eintakling. Allar tegundir bardagalista eru hins vegar leyfðar.
Mörg alvarleg atvik hafa komið upp eins og til dæmis árið 2007 þegar nánast allir leikmennirnir lentu í hópslagsmálum. Sá leikur lenti fyrir dómstólum og endaði með því að borgaryfirvöld bönnuðu keppnina í eitt ár. Nú í ár var bláa liðið dæmt úr leik í undanúrslitunum fyrir ofbeldisfulla hegðun.
Reglum hefur verið bætt við á síðustu árum til að reyna að hamla ofbeldinu. Keppendur mega nú ekki vera á sakaskrá og verða að hafa búið í Flórens í 10 ár eða lengur.
Leikurinn, sem er einnig kallaður giuoco del calcio fiorentino (flórenskur sparkleikur), er gríðarlega vinsæll í borginni og hluti af árlegri miðaldahátíð. Leikmenn taka þátt vegna heiðursins en ekki peninga. Á 16. öld voru sigurverðlaunin slátraður kálfur. Nú fá sigurvegararnir einungis frían kvöldverð á veitingastað.