Karlos Cashe, bandarískur ríkisborgari, segir farir sínar ekki sléttar af samskiptum við lögregluna í Oviedo í Flórída.
Þannig er nefnilega mál með vexti að í mars síðastliðnum hafði lögregla afskipti af honum og vöknuðu grunsemdir um að Cashe væri með talsvert magn fíkniefna í fórum sínum. Ástæðan fyrir þessum rökstudda grun var sú að í bíl hans fannst talsvert magn af hvítu dufti sem lögreglumenn töldu að væri kókaín.
Lögreglumenn eru sagðir hafa framkvæmt próf á efninu og niðurstöður þess hafi bent til þess að um kókaín væri að ræða. Cashe reyndi að útskýra fyrir lögreglu að hann starfaði við smíðar og hvíta duftið væri ekkert annað en gips líkt og notað er í gipsveggi.
Þar sem Cashe var þegar á skilorði vegna vörslu smáræðis af fíkniefnum, þar á meðal kókaíns, var honum varpað beint í fangelsi þar sem hann mátti dúsa í þrjá mánuði. Honum var sleppt á dögunum eftir að niðurstöður prófana sýndu fram á að Cashe hefði sagt satt allan tímann. Efnið sem fannst í bílnum var í raun gips.
Cashe sagði frá þessu í viðtali við WFTV-fréttastofuna og sagði hann að markmið sitt með því að stíga fram væri að hvetja lögreglu til að vanda vinnubrögð sín. „Ég vil ekki að þetta komi fyrir einhvern annan,“ segir hann.