Samkvæmt niðurstöðum nýrrar könnunar samtaka bandarískra mjólkurframleiðenda þá telja sjö prósent fullorðinna Bandaríkjamanna að kókómjólk komi úr brúnum kúm en 48 prósent fullorðinna eru ekki vissir um hvort kókómjólk kemur beint úr kúm eða ekki.
Washington Post skýrir frá þessu. Blaðið segir að könnunin hafi verið framkvæmd í apríl af samtökunum The Innovation Center for US Dairy. 1.000 Bandaríkjamenn voru spurðir út í mjólkurneyslu þeirra.
Auk þess að vita ekki með vissu hvernig kókómjólk verður til þá sögðust 29 prósent aðspurðra nota börnin sín sem afsökun fyrir að kaupa kókómjólk handa sér sjálfum.
Að sögn voru það aðallega þátttakendur frá borgum og bæjum sem svöruðu spurningunni um uppruna kókómjólkur af mikilli óvissu, svo ekki sé meira sagt. Cecily Upton, hjá samtökunum FoodCorps, sagði í samtali við Washington Post að eins og samfélagið sé í dag þá sé fólk „forritað“ til að fara í stórmarkaðinn ef það þarf að verða sér úti um mat. Hvergi í menntakerfinu sé fólki kennt hvar maturinn eigi uppruna sinn.
