Mamma fékk sér ostasósu á Doritos-flögurnar : Þremur vikum síðar er hún enn á spítala

Lömuð frá toppi til táar - Fimm staðfest tilvik bótúlíneitrunar

Bensínstöðin sem um ræðir. Veitingaleyfi hennar hefur verið afturkallað og reikna má með að eigendurnir verði uppteknir í réttarsölum á næstunni.
Eitrað Bensínstöðin sem um ræðir. Veitingaleyfi hennar hefur verið afturkallað og reikna má með að eigendurnir verði uppteknir í réttarsölum á næstunni.

Lavina Kelly, þriggja barna móðir frá Sacramento, hefur ekki getað talað né andað af sjálfsdáðum síðan að hún heimsótti bensínstöð í borginni og keypti sér Doritos-flögur með ostasósu. Talið er að meðhöndlun benínstöðvarinnar á ostasósunni hafi verið ámælisverð í meira lagi því Kelly varð fyrir svokallaðri bótúlíneitrun, sem er sjaldgæf tegund matarsýkingar.

Kastaði upp og átti erfitt með að anda

Nokkrum klukkustundum eftir að hafa borðað flögurnar og sósuna fór Lavina að finna fyrir mikilli þreytu. Þegar hún vaknaði daginn eftir var hún farin að sjá tvöfalt og fór þá á bráðamóttöku í grenndinni. Hún var send heim án þess að fá einhverjar skýringar á líðan sinni. Síðar sama kvöld byrjaði hún að kasta upp og átti erfitt með að anda. Barnsfaðir hennar, Ricky Torres, keyrði Lavinu þá aftur upp á bráðamóttökuna.

Síðan þá hefur ástandi Kelly hrakað hratt. Í dag er hún lömuð frá toppi og til táar og getur ekki einu sinni opnað augun. Hún getur hvorki tjáð sig né andað af sjálfsdáðum. Þegar hún vill sjá hverjir eru í heimsókn hjá henni þá hafa ástvinir hennar brugðið á það ráð að halda augnalokum hennar opnum með límbandi. Algjör óvissa ríkir um hvort að hún muni ná heilsu aftur.

Fimm önnur tilvik staðfest

„Við erum bara að reyna að skilja hvað gerðist. Ég er öllum stundum á spítalanum og er að reyna að fá einhver svör. Við skiljum ekki ekki hvernig þetta gat gerst, nachos-flögur og ostasósa, í alvörunni? Hvernig gat þetta gerst?,“ segir Ricky í samtali við Sacramento Bee
Þótt ótrúlegt megi virðast er saga Lavinu ekki einsdæmi. Fimm önnur tilvik um bótúlíneitrun hjá sömu bensínstöð hafa verið staðfest og þrjú önnur eru í skoðun. Veitingaleyfi bensínstöðvarinnar hefur verið snarlega afturkallað.

Fjölskylda Lavinu hefur kært bensínstöðina og mun fara fram á milljónir dollara í skaðabætur. „Aðeins mannleg mistök skapa aðstæður fyrir bótúlíneitrun. Við freistum þess að komast að því hvaðan sósan er upprunin. Þetta gæti verið þekkt vörumerki sem bensínstöðin keypti inn eða þá að hún hafi verið búin til á staðnum," segir lögfræðingur fjölskyldunnar, Bruce Clark.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.