Gary Ridgway er einn afkastamesti fjöldamorðingi Bandaríkjanna – Ted Bundy aðstoðaði við rannsóknina
Þann 18. febrúar árið 1949 kom maður að nafni Gary Leon Ridgway í heiminn í Salt Lake City í Utah í Bandaríkjunum. Gary var annað barn hjónanna Mary og Thomas Ridgway og ól manninn í Seattle í Washington ásamt foreldrum sínum og tveimur bræðrum. Æska Garys var enginn dans á rósum; heimilislífið var erfitt, hann átti erfitt með nám og varð oft vitni að heiftarlegum rifrildum milli foreldra sinna. Þá lenti hann oft í rifrildum við móður sína sem þótti stjórnsöm og afskiptasöm með endemum.
Það var snemma ljóst að Gary myndi feta braut afbrota og raunin varð nákvæmlega sú. Þegar upp var staðið varð hann einn afkastamesti fjöldamorðingi í sögu Bandaríkjanna með minnst 49 mannslíf á samviskunni. Sextán ára gamall, árið 1965, framdi Gary sinn fyrsta alvarlega glæp þegar hann leiddi sex ára dreng með sér út í skóg. Þar stakk hann drenginn með hníf í brjóstkassann og skildi hann eftir stórslasaðan. Drengurinn ungi lifði árásina af en sagði að Gary hefði gengið í burtu hlæjandi. „Ég hef oft velt því fyrir mér hvernig það er að drepa einhvern,“ sagði Gary þegar hann gekk frá drengnum.
„Ég hef oft velt því fyrir mér hvernig það er að drepa einhvern“
Gary hélt sig til hlés í mörg ár eftir árásina og gekk í herinn þegar hann var tvítugur, árið 1969. Hann barðist með bandaríska hernum í Víetnam en skömmu áður hafði hann gengið í hjónaband með sinni fyrstu eiginkonu, Claudiu Barrows. Heimildir herma að Gary hafi haldið ótt og títt fram hjá eiginkonu sinni og sótt stíft í vændiskonur meðan hann var í hernum. Innan við ári eftir að Gary og Claudia giftust var hjónabandinu lokið.
Árið 1973 kvæntist Gary konu að nafni Marciu Winslow og eignaðist með henni son. Á þessum tíma varð hinn verðandi fjöldamorðingi mjög trúaður, las ótt og títt upp úr biblíunni heima hjá sér og í vinnunni og gekk hús úr húsi og boðaði kristilegan boðskap. Á sama tíma fór að bera á óvenjulegum kröfum Garys til eiginkonu sinnar varðandi kynlíf; hann vildi stunda kynlíf með henni nokkrum sinnum á dag og á óviðeigandi stöðum utan dyra. Þá hafði Gary enn dálæti á vændiskonum og sótti áfram í félagsskap þeirra. Eftir sjö ár var hjónabandinu lokið en þarna hafði Gary unnið sem bílamálari um nokkurra ára skeið. Gary kvæntist sinni þriðju eiginkonu, Judith Mawson, árið 1985 og leit Judith á Gary sem hinn fullkomna eiginmann. Það sem Judith vissi ekki var að eiginmaður hennar var kaldrifjaður morðingi, en þremur árum áður en þau gengu í hjónaband hafði Gary framið sitt fyrsta morð.
Sumarið 1982 fannst lík sextán ára stúlku í ánni Green River í Washington-ríki. Stúlkan, Wendy Lee Coffield, hafði átt erfiða æsku og var tilkynnt um hvarf hennar nokkru áður en líkið fannst. Hún hafði verið kyrkt með nærbuxum sínum en lögregla hafði lítið til að byggja á við rannsókn málsins. Fékk hinn óþekkti morðingi því viðurnefnið Green River-morðinginn þar sem fleiri lík fundust á svipuðum slóðum næstu ár á eftir.
Árin 1982, 1983 og 1984 var fjöldi ungra kvenna myrtur í Washington-ríki. Wendy Lee var aðeins fyrsta fórnarlamb Garys en áður en árið 1982 rann sitt skeið hafði hann myrt sextán konur eða ungar stúlkur. Margar af þeim voru vændiskonur eða unglingsstúlkur sem komu frá brotnum heimilum. Næstu tvö ár á eftir hélt hann uppteknum hætti; árið 1983 myrti hann 24 konur og á árunum 1984 til 1998 myrti hann sex konur.
Lögregla hóf rannsókn málsins af fullum þunga en hafa ber í huga að á þessum tíma var DNA-tæknin ekki eins og við þekkjum hana í dag. Lögregla safnaði þó þeim lífsýnum sem fundust og naut meðal annars aðstoðar fjöldamorðingjans Ted Bundy, sem á þessum tíma sat á dauðadeild, sem veitti lögreglu sjálfviljugur innsýn inn í hugarheim fjöldamorðingja. Leið og beið en rannsókn lögreglu leiddi ekkert merkilegt í ljós næstu árin.
Árið 1987 gerði lögregla þær grundvallarbreytingar á rannsókninni að í stað þess að einblína á að finna hver morðinginn væri einblíndi lögreglan á að finna út hver væri saklaus með útilokunaraðferðinni. Þeir sem ekki var hægt að útiloka voru skoðaðir betur og var Gary Ridgway einn þeirra. Ástæðan er sú að árið 1980 hafði lögregla afskipti af honum eftir að vændiskona sakaði hann um ofbeldi gegn sér. Þau höfðu mælt sér mót nærri Sea-Tac flugvellinum í Seattle þar sem nokkur fórnarlömb höfðu fundist. Við yfirheyrslur sagðist Gary hafa ráðist á vændiskonuna í sjálfsvörn og þar við sat. Og árið 1982 hafði lögregla afskipti af Gary eftir að hann var gripinn glóðvolgur í bifreið sinni með vændiskonu sér við hlið. Þar var um að ræða konu að nafni Keli McGinness sem síðar fannst látin.
Fleira varðandi Gary vakti grunsemdir lögreglu; unnusti vændiskonu sagðist hafa séð bifreið, sem svipaði til bifreiðar Garys, skömmu áður en unnusta hans hvarf sporlaust. Þá vakti grunsemdir að Gary var ávallt skráður fjarverandi frá vinnu þá daga sem tilkynnt var um hvarf þeirra kvenna sem saknað var. Gary var svo loks handtekinn árið 1987 og féllst á að gangast undir lygapróf sem hann stóðst. Honum var sleppt vegna skorts á sönnunargögnum en þar með er ekki öll sagan sögð.
Mörgum árum síðar, eða árið 2001, kom hreyfing á málið þegar ný deild innan lögreglunnar tók við rannsókninni. DNA-sýni sem fundust á vettvangi komu heim og saman við DNA-sýni sem Gary hafði veitt mörgum árum áður. Fyrir dómi viðurkenndi Gary að hafa drepið milli 60 og 70 manns en hann var sakfelldur fyrir morð á 49 fórnarlömbum á árunum 1982 til 1998. Gary vissi sem var að hann ætti dauðadóm yfir höfði sér. Til að komast hjá þeim örlögum gerði hann samkomulag við saksóknara þess efnis að hann benti á hvar fórnarlömb hans lægju gegn því að fá sleppa við dauðarefsingu. Þann 18. desember árið 2003 fékk Gary 480 ára fangelsisdóm. Hann á enga möguleika á reynslulausn og mun deyja á bak við lás og slá. Gary, sem er 68 ára, afplánar dóm sinn í Washington State Penitentiary í Walla Walla í Washington.
